أيام الإعدادية، وباعتباري الطالب الوحيد في المدرسة اللي بيعرف إنجليزي، كانت المدرسة مكلفاني بالإذاعة المدرسية يوم الأحد، علشان يوم الأحد كانت الإذاعة بتبقى بالإنجليزي ما اعرفش ليه.
المهم وعلى مدى سنة كنت باقرا فيها على العيال أخبار غريبة وحاجات من نوعية هل تعلم بس بالإنجليزي، وغالبا ما كانش فيه حد لا بيفهم ولا حتى بيسمع أنا باقول إيه والناس كلها متنحة على الصبح، فقررت في مرة إني أجدد وأغني لهم أغنية بالإنجليزي في الإذاعة! ولغاية النهاردة مش عارف إزاي جت لي الجرأة إني أعمل العَملة دي!
وفي الأسبوع المشهود طلعت لهم بالأغنية وكنت متوقع إني بعد ما أخلص ألاقي أي رد فعل أو حتى شخص واحد يصقف بس ما لاقيتش! نفس النوم والتناحة! خلصت الإذاعة ورجعت مكاني في الطابور وسألت الواد اللي جنبي: هو أنا غنيت كويس؟
فضل باصص لي شوية وكإنه ما أخدش باله أساسا إن كان فيه أغنية، وبعد شوية تفكير قال لي: آه.
بعدها أقلعت عن كل الأنشطة المدرسية، وأما الغناء فبقى يقتصر على الحمّام!