وأنا صغير كنت متأثر جدا بقصص المغامرات اللي باقراها، خصوصا قصص زي "جزيرة الكنز"وسواها، وكنت باعمل تصرفات غريبة مستوحاة من القصص دي.
في مرة قررت إني أدفن الكنز بتاعي في حديقة العمارة. الكنز عبارة عن علبة بلاستيك حطيت فيها حبوب فول ومليتها ميّه. سجلت إحداثيات الكنز بدقة: ثلاث خطوات لقدام بعد السور وبعدين خطوتين يمين، حفرت ودفنت الكنز، وسجلت التاريخ على العلبة علشان القرار كان إني هارجع أطلع الكنز ده بعد سنة كاملة.
اللي حصل إن فات أقل من أسبوع وكنت خلاص مش قادر أستحمل وقررت إني لازم أطلع الكنز. نزلت ومشيت حسب الإحداثيات المتسجلة عندي وحفرت وفعلا الكنز كان موجود. فتحت العلبة فطلعت لي منها ريحة منتّنة لا تُحتَمل. أسوأ ريحة ممكن الواحد يتخيلها. رميت العلبة باللي فيها وبطلت أدفن كنوز، لكن ما بطلتش التصرفات الغريبة التانية.